مدونة للدفعة !! ... كانت فكرة صغيرة ، بشوف دايما ناس زمايلنا ليهم مدونات خاصة و صفحات على الفيس .. حتى أنا لما حبيت أكتب عملت مدونة خاصة بيا ، و دا مش غلط و لا عيب ، بس فى فكر أحسن ... فكر التكتلات و التجمعات اللى كل العالم بيسعى إليه !
إيه المشكلة لما نبقى دفعة و نحاول نجمع اللى بيكتبوا و اللى عايزين ينشروا كتاباتهم فى مكان واحد ؟؟!
طيب و هنستفيد إيه ؟؟
لما تبقى حضرتك لوحدك كده فى مدونتك أو صفحتك و بتحاول جاهدا نشر كتاباتك و سماع آراء الناس فيها و تعليقاتهم ، صعب أوى تنتشر خارج دايرة أصدقائك أو معارفك على الأقل فى البداية ... بالذات لو بتكتفى بالكتابة على الفيس بوك
طيب ايه مميزات التدوين ؟؟
دلوقتى المدونات أو بالأخص (المدونة دى) بتظهر فى محركات البحث ، بمعنى إن لو أى حد عمل سيرش على كلمة أو موضوع و كان موجود فى المدونة هتظهرله فى نتايج البحث !
حاجة تانية ان المدونة بتبقى زى موقع عالمى .. أى حد يعرف يشيره لأى حد و يدخل عليه أى حد
يعنى كتاباتك مش بتظهر بس للى عاملين لايك لصفحتك أو اللى ضايفينك فريند أو حتى اللى عاملهم تاج فى نوت :)
دى بتظهر لكل الناس .. و على حسب تميز الكلام اللى انت كاتبه بياخد لايكات و تشييرات و عدد قراءات متفاوت .. دا غير التعليقات و الريفيو
ميزة كمان عندنا فى المدونة : إننا (اللى بيكتبوا فى المدونة) بنحاول نقرأ كل جديد بيتحط و نقيم نفسنا أو بمعنى أصح : نكتشف نفسنا بالاضافة للجمهور العادى و كمان بننشره لأصدقاءنا على الفيس بوك و تويتر
بالإضافة طبعا للميزة الأعم للتدوين و هى :
الإمكانيات العالية جدا فى تنسيق و تحرير النصوص اللى بتكتبها .. و دى متعة التدوين الحقيقية
انت فى لحظة لو عايز تزعق ..
لو عايز توضح حاجة ..
لو عايز توصل إحساس ما ..
لو عايز تصحح مفهوم
تقدر تعمل كل دا فى ثوانى !
تقدر تكتب من اليمين و الشمال
و تحط فيديوهات مباشرة فى التدوينة Embedding يعنى زى كده :
و طبعا تقدر تتخلص من كتابة اللينكات بحروفها و أرقامها و تكتب لينكات زى كده .. بدل كده :
و تقدر ترفع الصور و تغير مكانها و حجمها على مزاجك ... حرية كاملة
دا غير الإحصائيات الدقيقة اللى بتفضل موجودة عن كل تدوينة أو الزوار منين و جم من خلال ايه و خلافة
فى رأيى متعة الكتابة فعلا على المدونات مش فى أى حته تانية .. بعد ما بتخلص الموضوع كده و تنشره و تتفرج عليه بتحس قد ايه انت طلعت حاجة جميلة بمجهود و وقت بسيط
ملحوظة أخيرة : المدونة دى استغرقت منى فى تصميماتها و إنشاءها حوالى 4 ساعات ... بعد ما خلصتها و شوفتها لأول مرة كنت فخور بيها جدا و قولت لنفسى : طب ايه بقى ، يعنى الموضوع كله 4 ساعات !!! ايه اللى كان مأخرنا السنين دى كلها ؟
ممكن الإحباط أو اليأس أو مبدأ "مافيش فايدة" لكن كل دا زال الحمد لله
أتمنى انكم تشاركونا فى مشروع الـ 4 ساعات اللى اتأخر 4 سنوات !
