بصراحة انا ما كنتش متشجع إنى أكتب فى الموضوع دا و خاصة اننا ساعة صيام .. بس جاتلى الجرأة لما شوفت إبداعات اللى شاركوا هنا
ملحوظة : التدوينة من وحى خيال المؤلف و أى تشابه بينها و بين الواقع فهو من وحى استعباط القارئ .. أنا نبهت أهو !
إحم ..
عارفة يعنى ايه بحبك ؟؟!!
انا نفسى ما كنتش عارف !
قعدت أدور على اجابة للسؤال دا كتير ..
يعنى ايه يعنى لما أحبك ؟
إيه اللى هيحصل ؟
و ايه نتيجة الحب دا ؟
طب و هتعرفى إزاى ؟
هقولك ايه ؟
و إمتى ؟
طب هو اللى انا حاسه دا يكون ايه ؟
و ينفع أقوله لحد ؟
الحاجة الوحيدة اللى اعرفها هو اللى انا حاسه ؛
بفرح لما بتبقى موجوده ، نفسى أحققلك أى حاجة تطلبيها .. أى حاجة
نفسى تعرفينى بجد ... نفسى أملَى عينيكى و ما يكونش فى حد أحسن منى فى نظرك أبدا
عارفة .. كتير بشوف ناس ممتازين و أخلاق و دين و ثقافة و كل حاجة .. فى الأول بخاف أكون اتسرعت انى ربطت حياتى بيكى
لكن مهما شوفت برضه فى حاجة بتبقى ناقصانى و انتى مش موجوده
فى حاجات بتحصلى ساعة ما أشوفك بتخلينى أنسى كل الدنيا دى
بس فى الآخر ما أقدرش اتكلم .. ما أقدرش أعمل أى حاجة !
لأنى بكل بساطة : أخاف عليكى منى
أخاف عليكى من واحد لسه قدامه سكة طويلة على ما يعرف طريقه يبتدى منين أصلا .. و الله أعلم طريقه دا فى الآخر مناسب لطموحك و لا لأ
عشان كده هفضل كاتم كل دا جوايا ... لغاية ما ييجى وقت مناسب أتكلم فيه ، و يا رب على ما ييجى الوقت دا تكونى لسه فاكرانى و لسه مستنيانى
يا رب تكونى حسيتى باللى بحاول أوصلهولك و يا رب تكونى وافقتى و تقوليلى : وافِقت و لو برمشة من عينيكى
عرفتى يعنى ايه بحبك ؟
