و أنت قاعد فى أمان الله.. تسمع صوت سخيف فى الشارع !!
صوت انفجار محدود !!
"خير يا ولاد.. دخلنا الحرب مع العدو !؟"
"لا يا حاج.. دول ولاد الجيران بيفرقعوا صورايخ !!!"
و كانت هذه "العادة" غير المقبوله زمان بتحدث فى العيدين الصغير و الكبير
و بتسبب إزعاج و رعب لا محدودين للناس فى تلك الاوقات !!
و لم يتكلم أحد أو يفتح فمه !!
و اليومين دول رمضان و كل سنة و أنتوا طيبين.. بقى شهر البمب و الصواريخ.. إضافة للقايمة الطويلة.. المسلسلات و الفوازير و المسابقات و الكنافه و القطايف و المهلبية و الملوخية.... !!
طيب.. دى مش غلطة الفسل الصغير.. فهو بيستقى "حلوه يستقى دى" عاداته من المجتمع حواليه.. إنما العيب على الأب و الأم اللى بيشجعوه و المصيبه "بيمولوه" عشان يشترى "أسلحة الدمار الشامل" اللى بيرعب بيها مخاليق الله !!
ماشى من يومين فى الشارع.. واد صغير ماشى يولع صواريخ و يحدفها على الناس.. فى قلب شارع البحر !!
و الأظرف الكتاكيت "المفترسين" اللى واقفين يرموا الصواريخ من البلكونات !!
البلد فى حالة ثوره.. و بنقول هنصلح يا رجاله.. و دعم المشروعات التنمويه.. و دول رايحين يصرفولهم كام مليار على البمب و الصواريخ !!!
و الحادث الاليم اللى حصل النهاردة من حريق فى مخزن المبيدات الحشرية و التهام العمارات و السيارات.. حادث مش برجعه للصورايخ
لكن قد يكون ده عامل مساعد.. و فى الحالة دى تبقى المصيبة أكبر !!
الرحمة !!
لا اقتصاد البلد مستحمل
و لا أعصابنا مستحمله
و لا المطافى مستحمله
ارحمونا و ربوا عيالكم.. و كفايه فرقعه على الفاضى و المليان !!
متنساش تخلى قلبك أبيض زى الثوبيا ^_~ !!
