بسم الله الرحمن الرحيم
لو فتحت دماغ أغلب طلاب الطب هتلاقى مساحة الدراسة جواها مساحة سرطانية عمالة تتوسع و تغطى على حاجات تانية كتير
الطالب دا من و هو فى حضانه و هو متفوق و متعود على أجواء المنافسة الدراسية
و كل ما بيكبر بتزيد مساحة الدراسة فى دماغة لدرجه إنك لو جيت تكلم حد فيهم فى حاجة تانية يقولك : خليك فى مذاكرتك .. هوا دا هيفيدك فى ايه ؟؟ مذاكرتك هى اللى هتنفعك آخر السنة !
طيب هتنفعنى آخر السنة ... و إيه اللى هينفعنى فى بقية حياتى و فى آخرتى كمان ؟؟!!
و مع تقدم مراحل دراسة الطب بتلاقى دا بيزيد أكتر عندنا نظرا لدفع جميع العائلات أبناءها للتفوق عشان ياخدوا "نيابة جامعة" و التنافس محمود أكيد ، لكن لازم الإنسان يتيح لنفسه فرصه إنه ينمى مواهبه ... و يكتشف ذاته بمرور الوقت
إحنا هنا فى المدونة دى بنقول لأ ... مش شرط عشان الواحد "بيذاكر" انه ينسى نفسه و يسمح للمذاكرة إنها تمحى كل شئ جميل فيه و تحول لكائن خرافى انقرض من 300 سنة ما بيعرفش يتعامل مع الآخرين و لا يقدر يتواصل حتى مع مرضاه .. و شوفنا من دول كتير ! و مش عايزين نتحول زيهم
المدونة دى بيكتبها شباب طب طنطا ... عن أى حاجة فى الدنيا غير المذاكرة و الدراسة
هتكتشف فيها أوجه جديدة عمرك ما شوفتها فى زمايلك ... لأن انا مؤمن إن لكل واحد فينا وجهٌ آخر
يا ريت تتابعنا .... و نتمنى لو تشاركنا ... لو ضغطت فوق على "انضم إلينا" هنكون سعداء بوجودك معانا
المدونة مفتوحة لكل زمايلنا اللى عايز يكتب فيها و الأولوية لزمايلنا من دفعة رابعة ... اللى لسه نتيجتها ما اتعلقتش :)
المدونة هتضمنلك انتشار أكبر ... و تجربة جديدة " للمستجدين فى التدوين " ، هتلاقيك بتكتب حاجات حلوة !
